Bakı, 11 fevral
M.F.Axundzadə adına Azərbaycan Milli Kitabxanası “Azərbaycanın görkəmli şəxsiyyətləri” seriyasından “Akademik Mirzə İbrahimov” biblioqrafiyasını nəşr etdirib.
Görkəmli Azərbaycan yazıçısı, dramaturqu və ictimai xadim Mirzə İbrahimov haqqında ilk biblioqrafiya yazıçının anadan olmasının 55 illiyi ilə əlaqədar 1966-cı ildə, ikinci biblioqrafiya isə 100 illik yubileyi ilə əlaqədar tərtib edilmişdir.
Azərbaycan Milli Kitabxanası tərəfindən nəşr edilən “Azərbaycanın görkəmli şəxsiyyətləri” seriyasından “Akademik Mirzə İbrahimov” fundamental biblioqrafiyası görkəmli Azərbaycan yazıçısı, dramaturqu, ədəbiyyatşünası və publisistinin, ictimai-siyasi xadiminin anadan olmasının 110 illiyinə həsr olunub. siyasi xadim Mirzə İbrahimov.
Biblioqrafiyanın elmi redaktoru Əməkdar Mədəniyyət İşçisi, professor Kərim Tairov, ön sözün müəllifi akademik, Əməkdar Elm Xadimi İsa Qəbibbəylidir.
Azərbaycan Milli Kitabxanasının hazırladığı fundamental biblioqrafiya 1930-cu ildən 2021-ci ilə qədər olan materialları əhatə edir. Biblioqrafiyada Mirzə İbrahimovun kitabları, dərsliklərdə, toplularda, dövri mətbuatda çap olunmuş əsərləri, yazıçının həyat və yaradıcılığına dair ədəbiyyat, dünyanın ən böyük kitabxanalarında saxlanılan nəşrlər öz əksini tapıb. Materiallar Azərbaycan, rus və digər dillərdə təqdim olunur. Biblioqrafik göstəricidə ədəbiyyat xronoloji ardıcıllıqla, xronoloji çərçivədə isə əlifba sırası ilə qruplaşdırılır.
Biblioqrafiyada ilk dəfə olaraq “Mirzə İbrahimov dünya kitabxanalarında” və “Mirzə İbrahimov dünya universitet kitabxanalarında” bölmələrində dünyanın ən böyük kitabxanalarında saxlanılan nəşrlər təqdim olunur.
Azərbaycanın xalq yazıçısı Mirzə İbrahimov böyük nasir və dramaturq olmaqla yanaşı, həm də görkəmli ictimai xadim, tanınmış tənqidçi və ədəbiyyatşünas idi. O, zəngin bədii yaradıcılığı ilə yanaşı, ana dilinin, milli-mənəvi dəyərlərinin qorunub saxlanması uğrunda mübarizə aparmış yazıçıdır.
Biblioqrafiya ədəbiyyatşünaslar, tədqiqatçılar, kitabxanaçılar, biblioqraflar və geniş oxucu kütləsi üçün nəzərdə tutulub.
Biblioqrafik göstərici ilə tanış olmaq istəyənlər linkə daxil ola bilərlər: http://anl.az/down/M.ibrahimov.pdf
bbabo.Net