Bakı, 11 fevral
Fevralın 28-də Müslüm Maqomayev adına Azərbaycan Dövlət Akademik Filarmoniyasında “Gənclərə dəstək” layihəsi çərçivəsində fortepiano musiqisi gecəsi keçiriləcək.
Filarmoniyanın mətbuat xidmətindən verilən məlumata görə, “Günümüzün gəncləri” adlı konsertdə istedadlı pianoçular, respublika və beynəlxalq müsabiqələr laureatları, prezident təqaüdçüləri Vurğun Vəkilov və Atabala Manafzadə M.Musorqski, A.Skryabin, S.Rahmaninovun əsərlərini ifa edəcəklər.
Qeyd edək ki, Vurğun Vəkilovun adı 2009-cu ildə Azərbaycanın gənc istedadlarının “Qızıl kitabı”na daxil edilib. Musiqiçi müxtəlif müsabiqə və festivalların, o cümlədən VIII Beynəlxalq “Citta di Pesaro” müsabiqəsinin (İtaliya), Ədili Əliyeva adına Pianoçuların X Beynəlxalq müsabiqəsinin (Fransa) və digərlərinin laureatı və I yerin qalibidir. Vəkilov Ecole Normale de Musique de Paris Alfred Cortot-un tələbəsidir. O, Azərbaycanın xalq şairi Səməd Vurğunun nəvəsidir.
Atabala Manafzadənin adı Azərbaycanın gənc istedadlarının “Qızıl kitabı”na salınıb. Manafzadə IX beynəlxalq “Davorin Jenko” müsabiqəsində (Serbiya), VII “Pera Piano” müsabiqəsində (Türkiyə) və digər müsabiqələrdə I yerin qalibidir.
Xatırladaq ki, “Gənclərə dəstək” layihəsinin ideya müəllifi Filarmoniyanın direktoru, Azərbaycanın Xalq Artisti Murad Adıgözəlzadə, koordinatoru musiqişünas Ayla Kərimova-Zəkəriyyədir. Layihə Azərbaycan Mədəniyyət Nazirliyinin dəstəyi ilə həyata keçirilir.
Layihənin əsas məqsədi ölkədə gənc istedadların üzə çıxarılması və dəstəklənməsi, dünya və yerli musiqi mədəniyyəti ənənələrinin qorunub saxlanılması və inkişaf etdirilməsi, musiqi təhsili problemlərinin həllinə yönəlmiş proqramların həyata keçirilməsi, yerli musiqiçilər arasında hüquqi şüurun formalaşdırılmasıdır. Ənənəvi olaraq ayda bir neçə dəfə keçirilən layihənin proqramları klassik incəsənət, xor musiqisi, muğam, caz və estrada musiqisi sahələrini əhatə edir.
Tədbir saat 19.00-da başlayır.
bbabo.Net