Azərbaycan (bbabo.net), - Bakı, 9 fevral,

Ötən il “Bakı Beynəlxalq Dəniz Ticarət Limanı” Qapalı Səhmdar Cəmiyyətində (QSC) yük dövriyyəsinin ümumi həcminin artımı 14,6 faiz, quru yüklərin daşınması üzrə 66 faiz, konteyner daşımalarında isə 11,6 faiz təşkil edib. Beləliklə, proqnoza 104 faiz əməl edilib.

QSC-dən verilən məlumata görə, yükdaşımaların həcmində müşahidə olunan artım Azərbaycanın bu regionda tranzit imkanlarını genişləndirir və xüsusən, konteyner yüklərinin artması Azərbaycan ərazisindən keçən dəhlizlərin beynəlxalq logistika şəbəkəsinə inteqrasiyasının göstəricisi kimi səciyyələndirilə bilər.

Transxəzər Beynəlxalq Nəqliyyat Marşrutunun mühüm həlqəsi olan limanda yükdaşımaların ümumi həcmi 5,6 milyon ton və ya 2020-ci ilin müvafiq göstəricisindən 14,6 faiz çox olub. Tranzit yüklərin payı 5,1 milyon tondan çox və ya ümumi yük dövriyyəsinin 92,7 faizini təşkil edib. Bu göstərici həm də üçüncü dövlətlərin Azərbaycandan keçən beynəlxalq nəqliyyat dəhlizlərinə marağının nəticəsidir.

bbabo.Net