Azərbaycan (bbabo.net), - BAKI - İtaliya Trans-Adriatik Qaz Boru Kəməri (TAP) vasitəsilə təbii qaz idxalının həcmini ildə 10 milyard kubmetrə qədər artırmaq istəyir.
Bazar günü bbabo.net-in məlumatına görə, bu barədə İtaliyanın Xarici İşlər və Beynəlxalq Əməkdaşlıq Nazirliyinin dövlət katibi Manlio DiStefano “La Repubblica” qəzetinə müsahibəsində bildirib.
“TAP İtaliyaya artan enerji qiymətlərinin təsirlərini yumşaltmağa imkan verdi. Bu gün təbii qaz enerji keçidini təmin edən əsas elementdir. Biz TAP-ın təbii qaz tədarükünü ildə 7 milyard kubmetrdən 10 milyard kubmetrə çatdırmağı hədəfləyirik. Gələcəkdə qaz kəmərinin ötürücülük qabiliyyətinin artırılması nəzərdə tutulur”.
Xatırladaq ki, 2020-ci il dekabrın 31-də Azərbaycan qazının Cənub Qaz Dəhlizi vasitəsilə Avropaya tədarükü başlayıb.Azərbaycan tarixdə ilk dəfə olaraq öz təbii qazını boru kəmərləri ilə Avropa bazarına çıxarıb. Dünyanın ən böyük təbii qaz idxalçısı olan Avropa bazarına birbaşa çıxışı olan Azərbaycan ixrac imkanlarını şaxələndirib. Cənub Qaz Dəhlizinin Avropa hissəsi olan TAP hər il İtaliyaya səkkiz milyard kubmetr, Yunanıstan və Bolqarıstana isə bir milyard kubmetr qaz tədarük edəcək.
Twitter: @Lyaman_Zeyn
bbabo.Net