AZƏRTAC RİA Novosti agentliyinə istinadla xəbər verir ki, Qazaxıstan Prezidenti Kasım-Jomart Tokayev parlamentdə çıxışı zamanı respublikaya qarşı terror müharibəsinin başlandığını bildirib.
“Ölkəmizə qarşı terror müharibəsi başlayıb. Düşmən son dərəcə qəddarlıq nümayiş etdirərək istənilən addımı atmağa hazır idi. O, hətta müqavimət ideyasını da boğmaq üçün əhali arasında qorxu səpdi”, - deyə dövlət başçısı bildirib.
Onun sözlərinə görə, Qazaxıstana hücum planına müxtəlif aspektlər daxil olub: hərbi, siyasi, ideoloji, dezinformasiya və s.
Bundan əvvəl xəbər verilmişdi ki, Nur-Sultan İstintaq Məhkəməsi dövlətə xəyanətdə şübhəli bilinərək Qazaxıstan Milli Təhlükəsizlik Komitəsinin (DTK) keçmiş rəhbəri Kərim Məsimovu 2 ay müddətinə həbs edib.
Yanvarın 2-də Qazaxıstanda kütləvi etirazlar başlayıb, vətəndaşlar maye qazın qiymətinin iki dəfə artırılmasından narazılıqlarını bildiriblər. Respublikanın ən böyük şəhəri olan Alma-Atada iğtişaşlar, talanlar, dövlət qurumlarına və təhlükəsizlik qüvvələrinə hücumlar başlayıb. Qazaxıstan hakimiyyəti yanvarın 19-dək ölkədə fövqəladə vəziyyət elan edib və antiterror əməliyyatına başlayıb.
bbabo.Net