Fransa prezidenti Emmanuel Makron Moskvaya səfərin mümkünlüyünü istisna etmədiyini bildirib. "Report" TASS-a istinadən xəbər verir ki, o, bu barədə Aİ ölkələrinin daxili işlər nazirlərinin qeyri-rəsmi görüşündən əvvəl Hauts-de-France regionunun Turkoinq kommunasına səfəri zamanı bildirib.

“Mən heç nəyi istisna etmirəm” deyən o, Rusiyaya mümkün səfərin “yaxın saatlarda danışıqların gedişindən” asılı olacağını əlavə edib.

Makron vurğulayıb ki, Fransa üçün prioritet Ukrayna ətrafında vəziyyətin deeskalasiyasıdır.

Yanvarın 28-də Rusiya və Fransa prezidentləri Vladimir Putin və Emmanuel Makron telefonla təhlükəsizlik zəmanəti ilə bağlı Rusiyanın təkliflərini müzakirə ediblər. Putin qeyd edib ki, Rusiya tərəfi yanvarın 26-da ABŞ və NATO-dan təhlükəsizlik zəmanətləri ilə bağlı saziş layihələri üçün alınan yazılı cavabları diqqətlə öyrənəcək və bundan sonra gələcək fəaliyyətləri barədə qərar verəcək.

Növbəti telefon danışığı yanvarın 31-də baş tutub. Dövlət başçıları telefonla gələcək təmaslar, habelə Rusiya və Fransa prezidentləri arasında şəxsi görüşün keçirilməsi imkanlarının operativ öyrənilməsi barədə razılığa gəliblər.

bbabo.Net