Azərbaycan (bbabo.net), - Bakı, 2 fevral
Azərbaycan Silahlı Qüvvələrinin Təlim-Tədris Mərkəzində Bakı qarnizonunun hərbi hissələrinin şəxsi heyətinin, şəhid ailələri üzvlərinin və müharibə veteranlarının iştirakı ilə Azərbaycan Ordusunun gənc hərbi qulluqçularının toplantısı keçirilib.
Müdafiə Nazirliyinin mətbuat xidmətindən verilən məlumata görə, əvvəlcə xalqımızın ümummilli lideri Heydər Əliyevin və şəhidlərin xatirəsi bir dəqiqəlik sükutla yad edilib.
Tədbirdə çıxış edən müdafiə nazirinin birinci müavini - Azərbaycan Ordusunun Baş Qərargah rəisi, general-polkovnik Kərim Vəliyev müdafiə nazirinin salamlarını və təbriklərini toplantı iştirakçılarına çatdırıb.
General-polkovnik K.Vəliyev əsası xalqımızın ümummilli lideri Heydər Əliyev tərəfindən qoyulan dövlət gənclər siyasətinin hazırda Prezident, Silahlı Qüvvələrin Ali Baş Komandanı İlham Əliyev tərəfindən uğurla davam etdirildiyini diqqətə çatdırıb. Əliyev Azərbaycan gəncliyinin inkişafında dərin iz qoymuşdur.
Bildirilib ki, dövlətimizin başçısı gənclərin bilik və bacarıqlarının artırılmasına, vətənpərvərlik ruhunda tərbiyə olunmasına, xaricdə təhsil almasına, eləcə də gənclər təşkilatlarının formalaşmasına və inkişafına ciddi diqqət yetirir.
“Gənclərin hərbi xidmətə hazırlanması, onların milli-mənəvi dəyərlər əsasında intellektual, fiziki və mənəvi tərbiyəsi dövlətimizin başçısının diqqət mərkəzindədir. Vətənpərvərlik, Vətən sevgisi Azərbaycan gənclərini torpaqlarımızın işğaldan azad edilməsi, ölkəmizin ərazi bütövlüyünün bərpası uğrunda döyüşlərə atılmağa ruhlandırıb”, - deyə Baş Qərargah rəisi çıxışında vurğulayıb.
Qeyd olunub ki, gənclər Azərbaycan ordusunun sıralarında qürurla xidmət edir, qarşıya qoyulan bütün vəzifələri layiqincə yerinə yetirirlər. “Cəmiyyətin aparıcı qüvvəsi olan gənclərimiz hərbi xidmət keçərkən Vətən və xalq qarşısında müqəddəs borcunu dərindən dərk edirlər. Səngərlərdə və döyüş mövqelərində xidmət edən əsgər və zabitlərimizin yüksək peşəkarlığı sayəsində ölkəmizin ərazisi, akvatoriya və hava məkanı etibarlı mühafizə altındadır”.
Sonda Müdafiə Nazirliyinin rəhbərliyi adından ordu gənclərinə xidmətdə yeni-yeni uğurlar və nailiyyətlər arzulanıb.
bbabo.Net