Tbilisi, 14 fevral, AZƏRTAC

Fevralın 13-də axşam saatlarında Gürcüstanda baş vermiş güclü zəlzələnin fəsadları məlum olub.

Xəbər verdiyimiz kimi, yeraltı təkanlar nəticəsində Dmanisi rayonunun bir neçə kəndində yaşayış binalarında çatlar əmələ gəlib.

Şahmarlı kənd sakini Şaban Qocayevin evinə ciddi ziyan dəyib. Fərdi yaşayış evinin divarı uçub.

Dmanisi şəhərinin meri Koba Muradaşvili Şahmarlı kəndində olub, Qocayevlər ailəsinə baş çəkib. O qeyd edib ki, xüsusi komissiya evin dayanıqlığını yoxlayacaq, dəymiş ziyan hesablanacaq və Qocayevlər ailəsinə kompensasiya ödəniləcək.

“Rayondan gələn mütəxəssislər digər evlərə də baxış keçirir, dəymiş ziyanın ölçüsü və miqdarı dəqiqləşdirilir”, - K.Muradşvili əlavə edib.

Qeyd edək ki, fevralın 13-də yerli vaxtla saat 22:25-də Gürcüstanda 6,2 bal gücündə zəlzələ baş verib. Zəlzələnin episentri Dmanisi yaxınlığındakı Sameba kəndində olub.

bbabo.Net