Azərbaycan (bbabo.net), - Qahirə, 12 fevral,
Əlcəzairin “Əl Harir” portalı Azərbaycan Prezidenti İlham Əliyevin müsahibəsinin əsas məqamlarını ərəbdilli oxuculara çatdırıb.
Ərəbdilli oxucuların diqqətinə çatdırılıb ki, bərpa olunan enerjinin inkişafı istiqamətində görülən işlərdən danışan dövlətimizin başçısı qeyd edib ki, bu gün bərpa olunan enerjinin tam istifadəyə verilməsi istiqamətində çox ciddi iş aparılır, müəyyən nəticələr var. O vurğulayıb ki, xarici firmalar, iri şirkətlər bu sahəyə sərmayə qoyurlar. Azərbaycan Prezidenti bildirib ki, “ACWA Power” şirkəti ölkəmizdə 240 meqavat gücündə külək elektrik stansiyasının tikintisinə başlayıb, günəş elektrik stansiyalarının tikintisi ilə bağlı BP və Birləşmiş Ərəb Əmirliklərinin “Mazdar” şirkətləri ilə danışıqlar aparılır.
Materialda Prezident İlham Əliyevin işğaldan azad edilmiş torpaqların su, günəş və külək enerjisi baxımından böyük potensiala malik olduğunu qeyd etdiyi, xarici investorları bu sahəyə investisiya qoymağa dəvət etdiyi vurğulanır. Dövlət başçısı qeyd edib ki, Kəlbəcər-Laçın zonasında və işğaldan azad edilmiş digər torpaqlarda təsdiq edilmiş gücü 9 min meqavatdan çox olan enerji potensialı mövcuddur. “Bizim ən böyük potensialımız Xəzər dənizindədir və təsadüfi deyil ki, hazırda dünyanın aparıcı enerji şirkətləri Xəzər dənizinə böyük diqqət yetirirlər, biz artıq təkliflər almağa başlamışıq. Xəzər dənizinin bərpa olunan enerji istehsalı üçün potensialı 150 min meqavatdan çoxdur. Ona görə də biz bütün bu işləri düzgün planlaşdırmalıyıq”, - deyə Azərbaycan Prezidenti vurğulayıb.
bbabo.Net