ABŞ Dövlət Departamentinin rəhbəri Entoni Blinken ABŞ-ın Ukraynadakı diplomatik missiyasının müvəqqəti olaraq Kiyevdən Lvova köçdüyünü bildirib. Bu barədə RİA Novosti məlumat yayıb.

“Rusiya qüvvələrinin (Ukrayna ilə sərhəd yaxınlığında) əhəmiyyətli dərəcədə artması nəzərə alınaraq, biz Ukraynadakı səfirliyimizi müvəqqəti olaraq Kiyevdən Lvova köçürürük”, - deyə dövlət katibi bildirib.

O qeyd edib ki, amerikalı diplomatlar Rusiya-Ukrayna sərhədində gərginliyin azaldılmasına yönəlmiş Ukrayna hakimiyyəti ilə səyləri əlaqələndirməyə davam edəcəklər.

“The Wall Street Journal” Amerika rəsmilərinə istinadən yazıb ki, Kiyevdəki səfirliyin əməkdaşları köçməzdən əvvəl şəbəkə avadanlıqlarını və kompüterləri məhv etməlidir – belə bir əmr Dövlət Departamentindən gəlib.

Daha əvvəl Reuters xəbər vermişdi ki, Dünya Bankı Rusiyanın hipotetik təcavüzü ilə bağlı xəbərlər fonunda onların təhlükəsizliyindən ehtiyat edərək işçilərini müvəqqəti olaraq Ukraynadan çıxarır.

Bundan əvvəl Ukrayna prezidenti Vladimir Zelenski xaricə gedən vətəndaşlara müraciət edərək demişdi ki, bir gün ərzində geri qayıtmasalar, ölkə “ciddi nəticələr” çıxaracaq.

bbabo.Net