Azərbaycan (bbabo.net), - Qahirə, 17 fevral,
Əlcəzairin “Əl Hivar” qəzeti və “Əl Harir” portalında Azərbaycanın bu ölkədəki müvəqqəti işlər vəkili Rəfail Bağırovun “Zəngəzur dəhlizi və Azərbaycanın enerji strategiyası” başlığı altında məqaləsi dərc olunub.
Məqalədə qeyd olunur ki, Prezident İlham Əliyev müsahibəsində bildirib ki, artıq planlarımıza Zəngəzur dəhlizi ilə Azərbaycandan Naxçıvan Muxtar Respublikasına, oradan isə Türkiyə və İrana yeni xəttin çəkilməsi daxildir. Dövlət başçısı əlavə edib ki, Zəngəzur dəhlizi təkcə dəmir yolu, avtomobil yolları, hava nəqliyyatı üçün nəzərdə tutulmayıb, eyni zamanda enerji ixracında da öz rolunu oynayacaq. Azərbaycanın ayrılmaz tərkib hissəsi olan Naxçıvan Muxtar Respublikasını elektrik enerjisi ilə təmin etmək, oradan xarici bazarlara, Türkiyədən sonra isə Avropaya çıxmaq üçün yeni xəttimiz olacaq. Bir xətt Gürcüstan və Türkiyədən keçir, ikincisi oradan keçməlidir.
Müəllif diqqətə çatdırıb ki, Prezident İlham Əliyev işğaldan azad edilmiş ərazilərdə enerji sektorunda xarici investorların iştirakındanışıb. O qeyd edib ki, ötən ay bu sahədə ən böyük şirkətlərdən biri - ACWA Power ilə Azərbaycan arasında imzalanmış müqavilə əsasında təməlqoyma mərasimi keçirilib və gələn il 240 meqavat gücündə külək elektrik stansiyası istifadəyə verilməlidir. Hazırda Cəbrayıl rayonunda gücü 200 meqavatdan çox olan günəş elektrik stansiyasının tikintisi ilə bağlı BP şirkəti ilə danışıqlar aparılır. Birləşmiş Ərəb Əmirliklərinin Masdar şirkəti ilə günəş elektrik stansiyasının tikintisi ilə bağlı danışıqlar aparılır. ACWA Power ilə birlikdə 240 MVt gücündə elektrik stansiyasının, İranla isə Xudafərin və Qız Qalası su anbarlarında 280 MVt gücündə elektrik stansiyasının tikintisi planlaşdırılır.
Sonda vurğulanıb ki, Azərbaycan dövlətinin başçısı işğaldan azad edilmiş torpaqlarda ermənilər tərəfindən dağıdılmış 30-a yaxın su elektrik stansiyasının yenidən qurulmasının mümkün olduğunu, onların yenidən tikiləcəyini bildirib və bu sahəyə xarici investorları dəvət edib.
bbabo.Net