Azərbaycan (bbabo.net), - BAKI - Azərbaycan gimnastı Selcan Maqsudova Bakıda keçirilən batut gimnastikası üzrə Dünya Kubokunda finala yüksəlib, bbabo.net şənbə günü xəbər verir.
Öz qrupunda ən yaxşı nəticəni Selcan Maqsudova göstərib. O, birinci cəhdə görə hakimlərdən 52.720 xal, ikinci cəhdə görə isə 53.100 bal toplayıb.
Yeni qaydalara əsasən, öz qrupunda iştirakçılar arasında ən yaxşı nəticə nümayiş etdirən bir gimnast avtomatik olaraq finala çıxır. İki cəhddən ən yüksək xal nəzərə alınır.
Qeyd edək ki, batut gimnastikası üzrə Dünya Kuboku fevralın 12-13-də Bakıda Milli Gimnastika Arenasında keçirilir. Yarışda Azərbaycanı milli komandanın üzvü Selcan Maqsudova təmsil edir.
Azərbaycan Gimnastika Federasiyasının 2022-ci ildə təşkil etdiyi ilk beynəlxalq yarışlarda dünyanın 13 ölkəsindən 60-a yaxın idmançı iştirak edir. Yarışlar Beynəlxalq Gimnastika Federasiyasının (FIG) yeni qaydalarına uyğun keçirilir.
İki gün davam edən yarışın nəticələrinə əsasən, kişilər və qadınlar arasında fərdi proqram və sinxron tullanmalar üzrə qaliblər müəyyənləşəcək.Bundan başqa, ənənəvi olaraq AGF Trophy Kuboku da mükafatlandırılacaq.
Yarışlar Azərbaycan Nazirlər Kabinetinin xüsusi icazəsi əsasında və ölkədə qüvvədə olan karantin qaydalarına, sanitar-epidemioloji tələblərə uyğun olaraq tamaşaçıların iştirakı olmadan keçirilir.
bbabo.Net