“Aeroflot” aviaşirkəti yanvarın 10-dan Qazaxıstana aviabiletlərin satışını bərpa edəcək, TASS aviaşirkətə istinadən xəbər verir.

Həmçinin bildirilir ki, Rusiya aviaşirkəti daha əvvəl yanvarın 9-na planlaşdırılan Moskvadan Nur-Sultana reysləri yanvarın 10-da yerinə yetirəcək.

“Qazaxıstan Respublikası ərazisində mövcud məhdudiyyətlərə görə, Airbus A330 təyyarəsinin Şeremetyevodan (terminal D) yola düşməsi yanvarın 10-da Moskva vaxtı ilə saat 4.00-a, Nur-Sultandan geri dönüş reysi isə yerli vaxtla saat 12.05-ə planlaşdırılıb. Növbəti uçuşlar gündəlik həyata keçiriləcək”, - deyə Aeroflot bildirib.

Bundan əvvəl “Aeroflot” respublikada yaranmış gərgin vəziyyətlə əlaqədar Qazaxıstana yanvarın 20-dək, Qazaxıstandan isə Rusiyaya uçuşlar üçün aviabiletlərin satışını yanvarın 21-dək bağlamışdı.

Yanvarın 2-də Qazaxıstanda kütləvi etiraz aksiyaları başlayıb. Bu, hökumətin qazın qiymətini 60 təngədən 120 təngəyə qaldırmaq qərarından sonra baş verib. Etirazlar sürətlə iğtişaşlara və polislə toqquşmaya çevrilib. Yanvarın 4-də hökumət komissiyası qazın qiymətini 50 təngəyə endirmək qərarını açıqlayıb. Yanvarın 5-nə keçən gecə Qazaxıstan prezidenti Kasım-Jomart Tokayev ölkədə yanacaq və ərzaq qiymətlərinin 180 günlük dövlət tənzimlənməsinin tətbiq olunduğunu elan edib.

bbabo.Net