Bakı, 2 fevral

Türkiyənin Konya şəhərində keçiriləcək V İslam Həmrəyliyi Oyunlarında futbol üzrə milli komandanı baş məşqçi Samir Əliyev meydana çıxaracaq.

Report xəbər verir ki, bu barədə AFFA-nın icraçı vitse-prezidenti Elxan Məmmədov fevralın 2-də keçirdiyi mətbuat konfransında məlumat verib.

AFFA rəsmisi qeyd edib ki, yarışda 1998-ci il təvəllüdlü və daha gənc, o cümlədən bu yaşdan yuxarı üç futbolçu iştirak edə bilər. Zaman baxımından da çətinliklər olacaq. Çünki avqustda 10 klubun iştirak etdiyi Premyer Liqa başlayacaq və avrokubok oyunları da olacaq. Sentyabrda millinin seçmə oyunları keçiriləcək. Mart ayında V İslam Həmrəyliyi Oyunlarının püşkatma mərasimi keçiriləcək. Bu zaman komandamızın məşqlərinə başlamaq planlaşdırılır.

“Futbol komandamız Bakıda keçirilən IV İslam Həmrəyliyi Oyunlarının qalibi olub. Ümid edirik ki, bu uğur Türkiyədə də təkrarlanacaq”, - deyə E.Məmmədov əlavə edib.

bbabo.Net