Bakı, 12 fevral

Azərbaycan Velosiped İdmanı Federasiyası (FVSA) yeni yarış mövsümünə start verib.

FVSA-nın mətbuat xidmətindən verilən məlumata görə, iştirakçılar şosse velosipedi üzrə Azərbaycan kubokunun birinci mərhələsində mübarizə aparırlar.

Yarışda müxtəlif klub və cəmiyyətlərdən üç yaş kateqoriyası üzrə 50 idmançı iştirak edir.

Azərbaycan Velosiped İdmanı Federasiyasının prezidenti Mədət Quliyev mətbuata müsahibəsində bildirib ki, əsası xalqımızın ümummilli lideri Heydər Əliyev tərəfindən qoyulmuş gənclərə qayğı siyasəti Prezident İlham Əliyev tərəfindən uğurla davam etdirilir. “Dünyada heç bir ölkə tanımıram ki, gənclərə bizim qədər diqqət və qayğı göstərilsin. Bugünkü tədbir təkcə yarışma deyil. Gənclərimiz yeni qələbələr qazanmağa hazırlaşır”, - deyən federasiya prezidenti gənclərimizin sağlam qalmaları, idmanda böyük uğurlar qazanmaları üçün çalışdıqlarını vurğulayıb.

Yarışın ilk günündə velosipedçilər 14 kilometr məsafəyə fərdi yarışda mübarizə aparıblar. 17 yaşadək velosipedçilər arasında keçirilən yarışlarda Respublika Olimpiya Velosiped İdmanı Məktəbinin üzvləri Radha Şabanova və Tamerlan Vitovski ən yaxşı nəticə ilə bütün rəqiblərini qabaqlayıblar. Bu məktəbin digər təmsilçiləri Diana Sidorenko və Kamran Mirzəxanov gənclər arasında birinci yerə layiq görülüblər. U23 yaş kateqoriyalarında ən yaxşı nəticəni 7 nömrəli Olimpiya Velosiped Məktəbinin üzvü Lalə Əbdürrəhmanova və Müdafiə Sənayesi Nazirliyinin velosiped idman klubunun nümayəndəsi Musa Mikayılzadə göstəriblər.

Azərbaycan kubokunun birinci mərhələsinin ikinci günündə velosipedçilər qrup yarışında mübarizə aparacaqlar.

bbabo.Net