Bakı, 14 fevral

Champions Chess Tour-un ilk mərhələsi olan Airthigs Masters turnirində Azərbaycan şahmatçısı Şəhriyar Məmmədyarovun rəqibləri müəyyənləşib.

Xəbər verdiyimiz kimi, fevralın 19-da start götürəcək yarışın ilk turunda Ş.Məmmədyarov rusiyalı şahmatçı Andrey Esipenko ilə döyüşəcək. Şahmatçımız fevralın 22-də keçiriləcək 14-cü turda hazırkı dünya çempionu norveçli Maqnus Karlsenlə qarşılaşacaq.

Turnirdə dünyanın ən güclü şahmatçıları ilə yanaşı, gənc istedadlı idmançılar da mübarizə aparacaqlar. Belə ki, yarışda Maqnus Karlseni, rusiyalı qrossmeyster Yan Nepomniaççini, ABŞ təmsilçisi Fabiano Karuananı məğlub edən 17 yaşlı Özbəkistan idmançısı Nodirbek Abdusattorov iştirak edəcək. Bundan əlavə, 16 yaşlı Hindistan idmançısı Rameşbabu Praqnananda və digər gənc şahmatçılar mübarizə aparacaqlar.

Ötən il keçirilən analoji turnirin ən yaddaqalan məqamlarından biri də Teymur Rəcəbovun finalda erməni şahmatçısı Levon Aronyan üzərində parlaq qələbəsi olub. Digər maraqlı hadisə isə rusiyalı şahmatçı Daniil Dubovun 1/4 finalda Maqnus Karlseni yarışdan kənarlaşdırması olub.

Yarışın birinci mərhələsi dairəvi sistem üzrə keçiriləcək və 16 oyunçudan yalnız 8-i pley-offa vəsiqə qazanacaq. Turnir fevralın 26-dək davam edəcək.

bbabo.Net